كلمات اغنية اغلى من الياقوت احمد مكي

غناء: احمد مكي
كلمات الاغنية: احمد مكي
الحان الاغنية: شادي السعيد
توزيع الموسيقي: شادي السعيد



يوم ميلادك يوم ما للدنيا انت جيت اول علاقتي بيك صوتك ما بيني و بينك حيط

سمعت صوتك استغربت اتلخبطت اتشديت قلبي اتنفض ما بين ضلوعي و من الفرحة بكيت



اول ما شفتك الدنيا لفت بيا ربي حبني و وهب ليا من عنده هدية



سرحت فيك ساعات فيك مني كتير حاجات يا رب تاخد مني بس الحلو في الصفات

و في وسط زحمة فرحتي فجاة هجم سكات مخلوط صور ابيض في اسود من اللي عشته و من اللي فات

يمكن عشان الضلمة في طفولتي كانت اكتر من نور عيل صغير قال بسم الله وقام يعدي في بجور

مش شايف شط او ميناء لآخر البصر مافيش امل كان نفسي في حد يعلمني و ينصحني و يبقالي المثل

ربك حماني و اتولاني برحمته مافيش جدل بعد ما كل سكة اتسدت و اسودت و الباب قفل

يا رب يا كريم اهديني و قويني و وفقني لسكة تربيته علي الشيء السليم

عارف اني مش مثالي بس طمعان في كرمك تخلي حاله احسن من حالي

و انا اوعدك يا رب هحاول ابقي احسن اب و اديه اللي ما شفته في نهر طفولتي الي نضب

كل يوم بيعدي و اشوفك فيه بتكبر يتفاجيء ان صفاتي بتظهر فيك اكتر و اكتر

ابتسامتي و ضحكتي و المشي و حتي تكشيرتي حتي نومتك رجل فوق رجل دي نسخة من نومتي

قبل وجودك الدنيا ماكنتش فارقة معايا قلبي ده كان خلاص قلب حجر دي مش كناية

جلدي تخن من قسوة الدنيا و مر الحكاية بقيت زعلان علي الشخص الي شايفه في المراية

لحد ما انت جيت غيرتني و كنت الهداية فتحت بايدك كل ابواب الرحمة جوايا

لما بحضنك و احس دقة قلبي جنب قلبك مية في المية ما حبتش في الدنيا قبلك

لما بحضر اول مرة ليك في اي حاجة قلبي بيرفرف و احس بالف حاجة و حاجة

احساس غريب جزء مني اتحول انسان بيزعل و بيفرح و بيزرع جوايا الحنان

خايف عليك من الدنيا يا ابني مالهاش امان و بدعي ربنا يحميك و يصونك هو الرحمن

كتبت رسالة ليك عشان لو قدري وقته حان و مش مكتوب ليا اكون جنبك لآخر الامتحان

عاوزك تكون صاحب عزيمة فولاذ حديد مهما الدنيا تحبطك صمم خليك عنيد

خليك واثق في نفسك عن حلمك اياك تحيد مهما اسود الليل و طال هيطلع فجر جديد

عاوزك لربك شاكر و جهد الناس تقدر و اوعي تظلم مهما كنت قادر ربك اقدر

اوعي تفضح عيب انسان لو ربك ستر كما تدين تدان ما تضمنشي القدر

لو قلت كلمة حق و الناس قامت عليك كانهم قالولك مبروك تسلم ايديك

عشان الكلب الميت ضربه مش مطلوب لكن لو كان شجر مثمر بيتحدف بالطوب

لو يوم ذنوبك تقلت ارجع لربك توب ربك لو حبك هيحبب فيك كل القلوب

ساعات بسرح و بسال نفسي و الدماغ تفكر يا تري حتبقي فعلا ضهري لما اكبر

لما العجز يبدا ينهش فيا و يجور عليا في عز احساسي بضعفي هيكون قلبك عليا

لما اللسان يتقل و الكلام يصبح بطييء و اعيد نفس الكلام اكتر من مرة ارجوك تطيق

يا ما طلبت مني اعيد حكي الحدوتة كتير و في كل مرة اعيدك قلبي كان بيطير

لما تلاقيني قدمت و مش مواكب عقل جيلك ما تركنيش لجهلي علمني من غير ما اجيلك

خليك عنيا نورلي طريقي لمنتهاه و افتكر اني من علمك معني الحياة

لما ابطل اقدر امشي لوحدي خطوتين لما اكون اضعف اني اشرب من غير معين

لما تموت الذاكرة و بالعافية اعرف انت مين وجودك جنبي كفاية لحد ما يجيني اليقين

كلمتين هقولهم عندي اغلي من الياقوت كنت معاك يوم ولادتك عايزك جنبي يوم ما اموت


الاستماع لاغنية اغلى من الياقوت احمد مكي




تعليقات
ليست هناك تعليقات
إرسال تعليق